dimanche 9 février 2020

A fuga di Filiconu


Una nuvella di Dumenica Leoni


In ‘ssa bedda dumènica di sittembri, Sgiò Cignali, tamant’à un orsu, spassighjava in a so machja, à mezu à i liccioli, circhendu qualchì fungu prumaticciu sott’à i fogli secchi. Piddava u so tempu, si campava stendu sott’à u soli, u musu bulighendu sott ‘à l’arba fresca. In ‘ssa piana, l’aceddi cantaiani, a vaddina luntana si sintia corra, è l’aria era fresca è pura. Ma qualcosa li feci subitu pisà u capu. Luntanu, in ‘ssi prati ch’eddu cunniscìa bè, i brioni si faciani senta. Avà Sgiò Cignali ùn brullicava più. Era com’è cutratu è stava ascultendu di tutti i so sensi. Iè, c’erani i brioni, ma c’era ancu peghju. C’erani l’abbaghji. In menu tempu ch’eddu ci voli à sarrà l’ochji, Sgiò Cignali si lintò à corra com’è un diàvulu scatinatu. Falò à sciappa capu in ‘ssu vaddincu, passendu com’è una saetta à mezu à i lamaghjoni. Cunnuscìa bè i so lochi ma u ghjacaru Filiconu, chì di tutta a so mansa era u più avvezzu à a caccia, avia presu un’ antra strada, solu, è mutu. In qualchì minuti, Sgiò Cignali ghjunsi di pettu contr’à u ghjacaru. Ancu di grazia chì, invichjendu, ùn avia persu, eddu, nè u pelu, nè u viziu. 

– O Filicò se dinò quì ! Ma tutti i santi dumènichi ti lenti à corra à daretu à mè !! Ùn ha nudda da fà di a to vita u me chjucu !!! 

– Ma vo’ rida o chì ? Iè mi n’impippu di tè è di tutta a to sterpa ! Credi chì so eiu chì dicidu tutti i dumènichi di vena à corra in ‘ssi lamaghji pieni à topi ind’è tù ti piatti ?! Ùn aghju a scelta di fà altrimenti chì so un disgraziatu com’è era a me povara mamma nanz’à mè – Filiconu si metti à pusà è si signa – riposa in paci o Mà ! 

U ghjacaru s’avanza mustrendu denti pieni à sciuma. Sgiò Cignali ùn pò più rinculà, si trova contr’à a riccia. 

– Ùn sapiu micca pà a to mamma ! Hà suffertu ? 

– A saparè o falzò, ghjè u to frateddu chì l’hà polza ! 

Dicendu cusì, Filiconu continueghja à avanzà. 

– Ùn a sapiu micca ti ghjurcu ! U me fratiddacciu era una croci, ùn ci parlaiami micca, erami à taglia cannedda !! 

– Ascolta o Cignalò, aghju un patronu, è ‘ssu patronu ti vo’ tumbà pà fà qualchì tianu, capisci ? È sta volta, ùn ti lacaraghju micca scappà ! 

– Quissu u patronu !!! Ti tratta bè o mancu ? D’apressu à mè devi liccà più colpi chè pezzi di pani nò ? Fileghji com’è tù se magru u me tintu ! Ti si vedini i costi !!! Di sicuru chì u tianu anch’i to cosci, ùn risica di fà ni. Chì faci d’i to ghjurnati ? Se liatu ? 

– Innò ! 

– Se sarratu ? 

– Innò ti dicu ! 

– Se in una cabbia incù l’altri tonti chì abbaghjani com’è tè ? 

– O mancu iè t’aghju un tettu pà dorma ! Ghjè veru chì ùn so micca grassu, parchì capisci, eiu ùn passu micca i me nuttatti à sciappà i sarrendi pà tichjammi di ligumi ind’è l’orti di l’altri ! 

Sgiò Cignali si metti à pusà, pidda dui ghjandi in terra è i si manghja fighjulendu u ghjacaru. 

– Uuh mighjà com’è tù se nechju ! Eiu so libaru u me chjucu ! Chì hè ‘ssa tintenna chè tù t’hà annant’à u coddu ? Hè pà raminta ti di vultà in a to prighjò tutti i seri ? 

Filiconu cala l’ochji è si ferma ammutulitu. 

– T’aghju da dì o Filicò, u to prublema ghjè chì tu manchi d’ambizioni. Ùn sunnieghji mai di cambià di vita è d’ùn più essa trattatu com’un ghjacaru ? 

– Avali credi d’imbuffammi anch’i to paroli pieni à viziu ? 

– Innò o tuntuliò ! Ascolta mi ! Ci cunniscimu dipoi un pezzu, sò annati avà chì quandu mi voltu se sempri daretu à a me spadda ! È à dilla franca, certi dumènichi, quandu m’arrizzu a matina, spergu di veda ti… Mi dicu sempri ùn sarà micca mortu in a nuttata, u corciu ? 

Dicendu cusi, Sgiò Cignali faci neci d’asciuvà una lacrima. 

– Fà la finì a to cumedia ! Chì pruponi ? 

– Ascolta, coddi ‘ssa riccia è in qualchì passu, ti truvarè annant’à u stradò. Quì, hè pienu à vitturi chì passani ; frusteri, famiddoni di pinzuti carchi à ziteddi. Tù, ti metti à mezu a strada è faci l’ochji afflitti. È po’ aspetti, è basta ! Vo’ scumetta chì a prima vittura chì veni, t’hà da piddà ? T’ani da trattà strà bè pà tutt’a to vita ! Ùn durmarè mai più fora, a ti dicu ! 

– L’ochji afflitti ? Chì sarani l’ochji afflitti ? 

– U sguardu chè tu piddi quandu se persu dopu a caccia ! 

Filiconu prova à fà un sguardu tristu è cala l’arechji. 

– Bravu ! Ci se ! Avali, scappa ti ni subitu quassù, chì si sentini l’abbaghji chì s’avvicinani ! 

Filiconu si volta vers’i prati po’ fileghja à Sgiò Cignali com’è s’eddu riflettiva un’ultima volta. 

– Và bè ! Mi ni vocu !! 

U ghjacaru parti in furia è codda a riccia. Sgiò Cignali u fileghja è, stendu solu, si metti à rida. 

– Hahaha !! Mi campu ! Avali ni so sbarazzatu da veru !!! Ma devu corra eiu dinò chì ci sò l’altri chì ghjunghjini ! 

Dopu a qualchì sicondi, Filiconu ghjunghji sfiatatu annant’à u stradò. Marchja un pocu è po’ senti una vittura. Si metti à pusà in un cantu è pidda i so ochji tristi. Miraculu ! A vittura si canza. Filiconu, tuttu cuntentu, faci trinicà a so coda. Un omu fala d’a vittura, apri a porta è u faci cuddà daretu. Filiconu si dissi chì s’eddu c’era un paradisu pà i ghjacari, allora era in ‘ssa vittura. Quì, dui ziteddi u piddani in bracci, è l’allisciani. Basgi è carezzi cusì, Filiconu ùn avia mai avutu di a so vita ! Tanti basgi, ancu annant’à l’arechji – avia a vargogna, u tintu, chì t’avia qualchì zecchi ! – è tanti paroli dolci ! Ùn li paria mancu vera ! 

– Forsa saraghju mortu nò ? Mi saraghju fattu sfracicà è saraghju cuddatu in celu ? pensava u tintu. 

Un’ uretta dopu, a vittura si canza. Filiconu, chì s’era addurmintatu daretu, sturdulitu ch’eddu era di tuttu st’amori, si sveglia quandu a porta si apri. L’omu u faci falà è una donna veni à circa lu è u faci andà in una cabbia ancu altri ghjacari. Unu, tamant’à un topu è vistutu anch’un manteddu rossu annant’à u spinu, veni à cantu à eddu. 

– Mi ! C’hè un nuveddu ! Comu ti chjami ? 

– Mi chjamu Filiconu, indu semu quì ? 

– In più d’essa malu se cecu ?? Semu in una cabbia è aspittemu un miraculu ! Mi pari chì tù se un ghjacaru di caccia nò ? 

– Iè, ma mi ni so fughjitu sta mani. Vulìu cambià di vita… 

– U me tintu, se cascatu bè ! Da quì à pocu, ani da metta u to ritrattu nant’à Facebook – ùn cunnosci micca ?!- pà ritruvà u to patronu, è da quì à dumani, vinarà à circa ti ! È cusì, in più di vultà in casa, s’è u tò patronu hè cattivu, piddarè dinò una bedda tribbia pà avè scappatu ! 

Filiconu, cù l’ochji afflitti da veru sta volta, si chjina tuttu accoltu annant’à u cementu ghjilatu. Fighjulendu a vittura chì si ni và è i ziteddi chì li facini à vedaci, si dici chì a prossima volta, ùn lacarà micca à Sgiò Cignali u tempu di parlà… 



Aucun commentaire:

Enregistrer un commentaire