mardi 24 mars 2020

Jo (Seconda parte)

Una nuvella di Jean-Yves Acquaviva


Hè à l’occasione d’unu di i so suggiorni in prigione ch’ellu avia scontru a mamma di Louise. U l’avianu purtatu, a faccia marturiata, un ochju gonfiu. Dapoi ch’ella travagliava nu st’infirmaria, avia vistu ferite in tutte e manere, quelle di a carne cum’è quelle di u restu. Avia intesu omi gattivi piegne cum’è zitelletti, d’altri stassi zitti malgradu e so piaghe aparte. Mai ùn avia incuntratu qualchissia di cusì indiferente à a so propria sorte, micca ch’ellu s’imprimuressi di l’altri, ma paria d’ùn risente nulla. L’avia cusgitu senza ch’ellu cappii u minimu lagnu, senza mancu ch’ellu strigni i denti. Avia sempre sappiutu mette distanza cù i prigiuneri, ùn lascendu vede nulla, nisun segnu di rimproveru o di cumpassione. Purtantu, fece ciò ch’ùn facia mai, li surride. Cusì luntanu ch’ellu si pudia arricurdà nimu l’avia fidighjatu cù u surrisu. Si firmò tal’un zitellu imbarazzatu da un rigalu ch’ùn saria di i so anni. Ste stonde funu a sola uchjata in una vita di timpurali. Per Jo u restu di i so ghjorni eranu una parentesi maiò sbarsendu di viotu chì esistia solu per dà torna di più valore à e stonde fughjiticce di sta felicità inaspittata. È quand’ella turnò à apresi, lascendulu solu, attippò dinù à u so chjassu d’addisperu palesu. Ùn l’avia cambiatu, ùn avia spentu l’incendiu. Forse l’avia appena ammattatu, piattendu a so rusta sottu u debbule linzolu d’un amore senza lindumane. Un sguardu ghjudicatu troppu appughjatu una sera avia bastatu à discità u mostru intanatu in u so core. U furore, a pulizza, a ghjustizia torna, a prigione sempre. 

Quand’ellu amparò chì sti mumenti persi avianu suminatu per vultà à via d’ellu, aduprò a prudenza. Ùn avè nulla era cusì faciule, a guaranzia d’una vita senza dulore, francata di u tagliu di i sintimenti, senza savore à sminticà nè culori à sguassà. Esse babbu è babbone, esse amatu, inchiitassi per quelli chì s’inchiitarianu per ellu, li paria una soma ch’ellu ùn pudaria trascinà. Eppuru, si lasciò fà, abbandunendusi torna à stu surrisu chì l’eredità avia pintu nant’à u visu di a so figliola. A lasciò entre in u so spaziu è più tardi entrì nu u soiu, longu sti mumenti di libertà ch’ellu gudia cù tantu risparu. 

Louise s’era stallata in un picculu appartamentu di l’immobule duve Jo avia un studiò. In u cunfortu spartanu chì i so rivinuti debbuli l’impunianu, s’eranu aparti unu à l’altra. Si cuntonu tuttu, amintendu ogni ditagliu, palisendu i so piccati, svilendu e so fiertà, ùn piattendu nisun’ombra nè alcuna luce cusì sbiadita ch’ella fussi. Li disse tandu quant’ella li pisava a gnuranza di e parolle chjinate nantu a carta. Avia tantu paura chì u scurdà s’arrubbi e poche belle cose chì a vita li avia cuncessu ch’ellu avaria vulsutu scrivele. Micca per spartele ma simpliciamente leghjele in casu chì l’età è i so demonii i si portinu. Louise chjappò un fogliu biancu è un stilò ch’ella fece passà trà e dite di l’omu, ponse una manu nantu a soia è u guidò per furmà e sei lettare di u so nome. Quella sera, quand’ellu vultò in casa, si pusò à u tavulinu di a so cucinaccia è impinnò, d’una scrittura sgalapata, e duie sillabe quantu volte a taglia di a pagina li permesse. Cullò nant’à u lettu è appiccicò à a suffitta u simbulu di a disfatta vicina di a so gnuranza pinsendu ch’ogni mane apraria l’ochji è vidaria a strada. 

U ghjornu nanzu ch’ellu tombi i so vicini, Jo s’era abbandunatu à e sirene alcullizate di a brama d’incuscenza. A facia qualchì volta, francatu da u sguardu di l’altri, da quellu di a so figliola soprattuttu ch’ùn avaria sicuramente vulsutu crede nulla di e virtù curative di a briachina. Straziendu à truvà u sonnu, stracquatu nant’à u so lettu, fidighjava u fogliu duve ghjacia u so nome è pinsava à u so purfigliolu. Un rigalu di u celu ch’ellu ùn meritava mancu appena, una siconda scianza per ellu chì cridia d’ùn avenne avutu una prima. Pinsava à Louise dinù, à tuttu ciò ch’ella avia sacrificatu per ritruvallu è apreli un purtellu nantu a felicità. Li avia amparatu ch’ùn ci n’hè celu cundannatu à i nuli. Li avia datu a chjave per discioglie e parolle inchjustrate da a so gnuranza. Avia fattu d’ellu l’essare umanu chì i so parenti avianu ricusatu di custruisce. Oramai cridia chì ancu u Bè era armatu è chì a guerra ùn era persa capunanzu. Si pudia tumbà a bestia, mandalla in a so tana, falli pate a fame è spirà ch’ella morghi. Jo a sapia avà. Sta libertà ùn si compra ma si paga cù a soma pisia di e scelte ch’è no femu. Prima, ùn avia nulla, lasciava l’evenimenti decide per ellu, cuntintendusi di patene l’estri. Accittava di crede ch’ellu ùn era ellu l’architettu di a so destruzzione. Avà chì Louise li avia rigalatu a paura di perdesi tuttu, misurava u valore di i so atti è u pesu di e so dicisione. Quella ch’ellu avia da chjappà oghje scatinava l’elementi in a so cuscenza nova. 

Aucun commentaire:

Enregistrer un commentaire