RH

Una nuvella di Laure Vincenti

M’hè cascata addossu cum’è una sborgna. 

In scola. 9h45. U titulu è l’ogettivi di a mo sequenza scritti à u tavulone. : « i modi differenti di gestione è di ricrutamentu in l’organisazioni oghje. » 

Prugramma imbiziosu. Ottu ore pè compielu. Un Parigi-New-York senza i filmi è i ripasti, ma cù a fatiga di u scambiamentu orariu è i pedi chì ingonfianu. 

Avia da cumincià incù u management participativu. Tamanta scruccuneria. Fà crede à l’elevi chì i impiegati cuntribuiscenu à a presa di decisione, solu perch’è ch’omu li sciacca una scatula à idee numerica – u peghju di i snubisimi – sottu à u nasu (pè ùn dì in culu). Per via ch’omu i cunvucheghja, i riunisce, i cunsulta, i face vutà, i stà a sente, tagliemu à l’accorta, i manipuleghja. 

Mi ghjunghje u vomitu ma mi tocca à travaglià. Mi vene in core di parlalli d’Amazon è di A Posta. È ancu di Christine Renon et Jean Willot. Eppuru, a mo fideltà à l’educazione Naziunale m’hà purtatu à creà un TP « vò più in dà » nant’à u « management di a felicità ». Puttana. Hè quant’è parlà di « cicculata light » o di « burger vegan ». 

Ossimoricu. 

Ma micca cumedie. Fideltà è ubidienza. O guasi. In a mo cartina, Cadres noirs, di Lemaitre. Una bomba intelettuale chì pò atumisà a mo sequenza in qualchì pagina. 

Avia dunque previstu di caccià u mo libru mentre à retta. Ma retta ùn ci n’hè statu. 

Cornu putente. 

Pianu particulare di messa in securità lanciatu. Eserciziu di cunfinamentu per via d’una intrusione. 

- « Merda ! O zitè, ci tocca à chjodeci ! » 

« Aduprà i mobuli. Spinghje i lumi. Alluntanassi di i muri, porte è finestre. Stracquassi pè u pianu daretu à ostaculi sodi. Fà rispettà un silenziu assulutu. Telefuni in modu silenziu senza vibrore. Stà vicinu à persone chì prisentanu un stress è rassirinalle. 

Aspittà a venuta di l’osservatore. » 

Per riassume, pruvà à piattami salvendu i zitelli. 

Trentaquattru. I zitelli. Quantunque. 

A principiu d’annata ùn eranu chè trentadui è, niscentre, mi sò messu à crede chì a squadra era cumpletta. Ma innò ! L’assenteisimu curante di i numeri 19 è 23 ghjustificava a integrazione di i numeri 33 è 34, ci vole à rentabilisà u spaziu. Ùn m’ammerdava abbastanza d’assiste à u sprifondu di i mo corsi da elevi chì sfidavanu tutte e legi di u spaziu-tempu, mi tuccava ancu à accoglie dui rinforzi novi chì benefiziavanu d’una « passerella » (spezia di mubilità senza cumplessi appiegata à l’elevi persi). 

Mancu una carrega viota dunque. 

« Si ne puderebbi mette torna », dicianu ! 

L’educazione Naziunale era in traccia di mutassi in un veru comptoir Air-Corsica in tempu di surbooking. Ma senza u persunale. 

Trentaquattru pelli a salvà dunque. Cù un iperattivu, una epilettica, dui dislessichi, unu ghjuntu pocu fà d’Afghanistan, un disfasicu à altu putenziale, un dipendente di cannabis, un strapazzatu, i trè chì u strapazzavanu è una dificente cugnitiva (lista incumpletta). 

In fin’di contu, ùn mi paria micca peghju chè di instruilli, educalli, furmalli. 

- « U primu chì ride o chì filma u crepu in corpu ! » 

- « Ma Monsieur… è a ricreaziò ? » 

- « O Kevin chjodila ! » 

Quandu chì a porta hà saltatu, di modu stranu aghju pensatu à a porta. È dopu à Tarantino. Si n’hè andatu tuttu di male à a prima sparata. U sangue hè zirlatu è unepochi sò cascati. Ridiculi. Senza classa nè ritenuta. Una mansa di carne spapersa in pianu. U travagliu di l’agenti di pulizia serà più difficiule chè a l’abitutine sta sera. I muri si sò culuriti di rossu di manera viulente, un rossu vivu, troppu vivu per esse veru. Aspittava l’entrata in scena di Mr Blonde è di i Stealers wheel. Disappuntu. Di pettu à mè, solu un vechju tippu accasciatu è senza garbu, malgradu l’arma ch’ellu tenia incù debulezza voltu i vivi. 

- « Site voi l’osservatore chì vene per dì ch’ella hè compia sta cumedia ? » 

- « Innò. » 

A segonda sparata hà sdruttu i pochi sbattulimi di core è saltichjimmi chì davanu sempre forma à a maccarella umana davanti à mè. 

Bang bang. 

- « Hè ora di compie a seanza o zitè. » 

L’assassinu ? Alain Delambre, 57 anni, Direttore di e rissorze umane à u disimpiegu dipoi quattru anni. Puttana di quadru neru. 

Traduzzioni à cura di Fabien Raffalli