Premiu Timpesta 2020 : U Pittore

Una nuvella di Laurélène Cavallini-Negrel

U ghjornu ch'e’ aghju cunnisciutu à Canda hè statu un ghjornu piuvosu. Ùn era nè ghjovana, nè fina, nè assai bella. Per dì a verità, era ancu francamente brutta. Ma u decoru li dava una frescura nutevule. Curria longu u lavu, quellu induve u sole si affaccava ogni matina à perseguì a guazza è illuminà i chiralbi chì u vaghjimu culuria di rughjina. Ci era una certa puesia in questu locu, forse à causa di l'innumerabile sfumature di verde chì eranu dipinte. O sicuramente grazia à a melodia valentosa di a brisa chì sfrondava nantu à i monti di petre. Ci era certamenti posti più belli in u mondu, ma questu cunniscìa una spezia di bellezza sulenna. Cumu s’è, di notte, e stelle s’adunianu per dà nascita à culori novi, originali, chì variavanu da u giallu à l'indacu. Alcune rocce grisgiogne venianu puru à creà un certu cuntrastu, ma ùn ci faciu casu daveru, perchè ch’elle stavanu quì, currendu appressu à ùn si sà chì, ùn si sà quale. 

Devu ammette chì duie cose mi primureghjanu in a vita, è da quandu ch’e’ sò assai ghjovanu. A natura è u corpu di e donne. Sariate surpresi di vede quantu i dui ponu esse simuli. Ma ci sò i capi d’opera più impressiunanti chè l'altri ... I petti, senza dubitu. Rondi, fermi, coprenu un corpu nudu cù un bellu dispusitivu. È ci sò curve chì ùn ci ne scurdemu. Ne sò ispiratu perchè ci trovu una dulcezza prufonda è una sensualità terribile. Hè un pocu quessa infine, d’esse pittore, buscà a vuluttà di e cose semplici per fanne risorte l’ultima lascività. 

Canda era una di quelle donne atipiche ripresentate in e credenze celtiche : i capelli longi rossi è ondulati venianu à nasconde e curve di u so pettu, è in particulare i caratteri goffi di a so faccia, mentre chì millaie di taccule rosse accentuavanu u so nasu appinzatu. Avia una gravità strana in i so ochji chì a facianu vede un pocu mistica, incantevule. È, ella, mancava à modu crudele à a mo cullezzione. 

Perchè i criminali, spessu, tenenu cantine in casa ? Sò stanze scure, umide, disturbanti è peghju, stanze chì attiranu u suspettu. E cantine ùn mi piacenu, nò, manc’appena, eu preferiscu sceglie una bella camera, decurata cum'è una casa di puppatula, cù un culore arrusulatu è i nodi chì adornanu i muri. Eccu induve aghju pusatu à Canda quandu a spiazzai da un altru locu, ma ùn piantava di briunà à a morte. Ùn capiscu micca a mancanza di ricunniscenza ind’è ‘ssa donna, o ind’è e donne in generale, d’altronde. Nunda hè mai abbastanza bellu per queste creature. Sò traditrici è sò false, sapete, vi duvariate misfidà ! Infine, in ciò chì cuncerna à quista quì, era particularmente salvatica è feroce, per quessa ch’aghju avutu da spiazzalla in altrò, cù l'altre.