Una nuvella di Dumenicu Santelli
Clotilda Town in lu statu d’Alabama, duie ore di matina. In lu Cunteu, cum’elli dicianu a ghjente parlendu di stu lucacciu : “Quì ghjesù Cristu hè passatu di notte”. Donald è i so amichi escianu d’una taverna di Strip-tease. Semu d’inguernu, ma ellu và sempre sbracciatu per mustrà i so tatuasgi. Un dissegnu d’una sarpa chì stranguleghja un omu neru, cun scrittu : KKK.
In scola quand’era zitellu, cortu è grossu, Donald avia per cugnomu « u Tacos », perchè l’altri di truvavanu una sumiglia cù un messicanu. Ma oghje Donald ùn era più quellu zitellu goffu, avà era un omu di u New KKK, un americanu puru sin’à u più prufondu di a tripa. Versu l’aduliscenza, per fassi valè, diventerà di più in più crudele. Una volta hà presu un zitellu neru ch’era u so amicu dapoi sempre, l’hà « pestu cum’è u sale », è brusgiatu a palma di a manu cù a sigaretta. Dopu à què, più nimu ùn si riderà d’ellu, era rispettatu in lu microcosmu di u so picculu quartieru malfamatu.
Sta sera, cum’è sempre, anu betu cum’è purcelli, è techji di biera si lascianu andà à ruttizà. Ghjè ancu un ghjocu di vede quessu chì face u più grossu è u più forti. Ma u so più bellu amusu, ghjè quand’elli scontranu un omu neru. Tandu di sciaccanu una tribbia, tutti inseme, calci in bocca è induv’ella casca. Pochi ghjorni fà, unu chì pruminava cù à so cumpagna l’anu lasciatu per mortu.
Donald è i so amicacci portanu sempre a pistola, micca ch’elli t’appianu a paura ma hè a tradizione. In fine cusì à dicenu. Sta sera quì, Donald di piglia a scimità di tirà nant’à u panellu di u carrughju battizatu « Rosa Parks. Donna nera, simbulu di a lotta contr’à a sigregazione, ch’avia ricusatu di lascià a so piazza à un biancu in lu bus, cum’è era a regula in l’annati 50. Donald si metti à culpità cù u so Smith&Wesson, un lasciatu di leva in purleva dapoi l’arcibabbone, capu maestru d’una piantazione di zuccheru. Cù stu revolveru, d’apressu à i so raconti firmati in la famiglia, averia sbattutu d’una palla in lu spinu, un schiavu chì vulia scappà. A libertà o a morte, ellu avia sceltu.
Tuttu mondu ride, ùn c’hè mancu risicu di fassi chjappà da a pulizza, unu di a banda hè u sceffu di u scagnu lucale. Pò una palla fiscia, sbuculeghja u muru è Donald d’un colpu si ne fala in terra stichitu. E rise cumencianu à calà d’intensità di manera prugressiva è l’unu sclama « C’hè statu un ribattu di a palla putana gobba ! »
A sirena di l’aiutu medicale và à quantu ella ne pò nant’à a strada, Donald hè alungatu u corpu in sangue. Ghjuntu à l’uspidale, ci vole à fà un’ uperazione d’urgenza, ma c’hè bisognu di sangue AB- per una transfusione, un gruppu assai scherzu. L’uspidali lampa una chjama nant’à i rete suciale, è per furtuna, un omu si presenta. Ellu hè sopra piazza, veghja u so figliolu, un ghjuvanellu neru minatu à tumbera, di pocu in carrughju, mentre ch’ellu spassighjava cù a so piccula amica. Nimu ùn hè statu identificatu, è l’inchiesta di pulizza s’approntà à classà u cartulare. Sionti à ella, saria un reglamentu di contu trà parechji gang.
L’affari face à prima pagina di e News lucali, per u donu di l’omu ma dinù per l’agressione di Donald. U sceffu di a pulizza avia fattu testimone, ch’una banda di neri armati d’avianu tiratu à dossu, perchè suspresi intraccia di vende a droga.
Qualchì ghjornu dopu, u giovanu neru more in reanimazione induv’ellu era in sonnu prufondu dapoi quella sera. U statu di Donald hè sempre pessimu, a palla hà fattu disguasti è averia bisognu d’un impiantu d’un renu. Casca torna bè per ellu, u zitellone chì vene di more hè in la lista naziunali di i dunatori è currispondi à listessu tippu.
I settimani passanu è Donald in la so camera d’uspidale cumencia à imparà ciò ch’ellu s’hè passatu. Ci sò i cumpagni di sborgna chì si facenu risati, biffendu a manera di parlà africana davant’à ellu per macagnallu. Donald, puru americanu, avà in lu so corpu hè impuzzichitu. Sta bruzzulia finiscerà per tumballu, hè sicura. Cume u sangue africanu pò esse cumpatibuli cun’ellu, omu biancu sputicu ? È u renu ? I neri ùn sò micca fatti listessi, sò bestie salvatichi, u babbu l’hà sempre detta.
Era megliu à more ch’è di campà cusì. E notte sò fatti di sunniacci, si vede cù un ossu in lu nasu ballà ingiru à un focu, mezu nudu à u sonu di u tam tam. Si sveghja cù timori, ùn puderà micca vultà in casa soia, avà hè un monstru, una bestia di fiera, più nimu ùn di farà cunfidenza in l’urganisazione u New KKK. O madonna chì scumpientu, hè intraccia d’abambulì. Un ghjornu cù lu cultellu presu nant’à u porta piatta, s’inzecca a so piaga per fà sorte u sangue. Piglia una goccia nant’à u so ditu è principia à annasà la. Di si pari chè stu sangue appie un sisu particulare. Ormai hè leccu, a sola soluzione hè di fà un’ azzione di sterpera à l’uspidali, è pò tumbassi per salvà u so onore è quellu di u KKK. Cusì firmarà in la storia cum’è un martiru, un eroi di a supranità bianca.
Dumanda à l’unu di a so banda di purtalli u Smith&Wesson piattu a sera di l’accidenti. Po’ un ghjornu, falla à l’urgenza è tene a pistola sottu à a so camisgetta. A sala hè colma di ghjenti, latinos, neri, bianchi. D’un colpu si mette à briunà à l’uni di scartassi di l’altri. Frà tempu, a porta automatica s’apre, i succorsi corranu pussendu un brancale. Portanu un omu neru, u bracciu tazzulatu è fertu per arma à focu. Donald in pienu mezu di spinu, hè squilibratu è una detunazione ribomba. Un colpu hè partutu è una palla l’hà sciappatu i ciarbelli, scialbendu u muru biancu à l’ingiru. Sta volta, Donald ùn averà drittu à un’ altra scianza di diu o di u diavuli, ùn si sà. Certi urgani d’ellu, servaranu à salvà ghjenti dopu a tumbera di a ghjesgia di Peterston Black Church, accaduta listessu ghjornu in Carolina Suttana.
U lindumane matina u ghjurnale di Clotilda Town ne face a so una. L’affare di a prova di tumbera in l’uspidale, ma dinù l’azzuffi in carrughju, dipoi chè u sceffu di a pulizza appia tiratu nant’à un omu neru, mentre ch’ellu ghjucava cù u so zitellu tinendu una pistola à acqua in manu. A palla di calibru putente d’avia macinatu u bracciu, è sò stati ubligati à mozzà lu. In fine arristatu per sta baviutura, cù l’aiutu d’un filmettu postu nant’à un webmedia, u pulizzeru di a banda di Donald dichjarerà davanti à u tribunale, ùn esse manc’à pena razzistu. Per prova, ellu dinù avia avutu un corciu amicu di sangue africanu…
Illustrazioni : Right Rally at Charlottesville, Samuel Corum, Anadolu Agency
Aucun commentaire:
Enregistrer un commentaire