lundi 26 octobre 2015

Prisintazioni

Vi n'inviniti di Tarrori è Fantasia ? Un bloggu chì pruposti i scritti di fizzioni  in corsu, cù a tematica di u fantasticu è di l'orrori. Fù una bella avvintura, chì durò da u 2010 à u 2012, è chì à u finali sbuccò annant'à una publicazioni cullittiva.

Tandu hè un' altra avvintura literaria chì no v'annuncemu. Sempri cù l'idea di drizzà i verghi tr'è no è di truvà i piumi di dumani, quissi chì ci abbisognani par creda ch'una literatura in lingua corsa hà da cuntinivà à spannassi. Certu, 'ssu novu situ ùn sarà apartu à tutti i cuntribuzioni, è uni pochi di reguli ci vularà à accittalli. A prima, ben sicura, hè di scriva in corsu, è di scriva cù a maistria di l'urtugrafia, chì a squatra ridotta di a noscia rivista hè benevula, è li vinarà mali di cunsacrassi à i currizzioni troppu grevi. 

A siconda regula cunsisti à prupona quì nuvelli, è solu nuvelli. Testi curti chì pudarani essa publicati in linea è firmà lighjitoghji. Una publicazioni in una volta sarà u meddu, ma in certi casi, ci adattaremu è staccaremu a stodia in parichji episodii. Micca troppu non più, un testu ghjudicatu troppu longu ùn pudarà truvà a so piazza quì. Vi dumandemu di capisciaci è di rispittà u nosciu impegnu. Altru puntu chì ci pari d'impurtanza : ancu sì no' ùn ci piddemu pà tarcani di u stilu o di a bella lingua, è ancu s'idda pò cascà sutt'à u cennu di l'evidenza,un niveddu minimu di qualità literaria sarà chiestu à ugni participanti..

Infini l'ultima regula hè di siguità a tematica - larga - chì no prupunimu quì à i scrittori. Tonu è Timpesta, hè a scelta chì no emu fattu pà apra a criazioni à i testi d'avvintura, i scritti di viaghju, i raconti di guerra... Circà in a Stodia, invintà i distina, sunnià d'orizonti novi è traveda ciò ch'iddi sarani i scuttussati futuri di u mondu v'apparteni avali. No, vi lighjaremu sempri cù piaceri, è accittaremu d'apra u nosciu spiritu à l'aria, veni à dì à tutti i vosci  belli cuntribuzioni. And now, ladies and gentlemen, tocc'à vo !

Calibanu, pà a squatra di Tonu è Timpesta.

6 commentaires:

  1. Tarrori è Fantasia hè statu una bella aventura. Quessa serà fors eancu più bella. Ready, Steady, Go!

    RépondreSupprimer
  2. cumu hè chì a mo signatura cumparisce? ai Google big btother?

    RépondreSupprimer
  3. Cumparisci Francesca. È ti ringraziu pà i to incuraghjimenti. :-)

    RépondreSupprimer
  4. Aghju fighjulatu, ùn possu fà nudda pà mascarà i noma di quissi chì cumentani.

    RépondreSupprimer
  5. ù face nunda...sò stata surpresa ma cum'ùn mi vogliu piattà...

    RépondreSupprimer
  6. illustrazione magnifiche...cum'è sempre.

    RépondreSupprimer