samedi 20 janvier 2018

L’amazona

Un testu di Petru Pasqualini




Ind’u cumbugliu sempiternu di i marosi di a so anima, schizzò una cavallata appruntendusi, senza nisuna certezza, à tene caru o turnà à lampà tuttu nant’à u so passeghju. 

U sbolleru annunziatore di u tsùnami chetu caccia i resti pulluati è guastati ind’a l’aria digià pervertita. Si mette in anda l’onda maestra, attirendu i curenti purificati per inizià u so periplu unicu, rinnuvendu u ciculu marinu chì si capia fermu. 

S’appronta a schjuma à firtilizà, al di fora, à casu di l’intoppi cù i curenti ribelli, ciò chì, ùn lascendusi sottumette, venerà nutrisce cù a so foga ghjuvanile, u sciacquittime originale. 

U ricordu di e timpeste scorse s’aghjunghje à u marosu avà maturu per dalli una forza creendu punti d’armeghji tale scugliere di curallu à gallu in issu liquidu digià creatore di cèllule vive. 

I sbòllari di a mente participanu à a mossa purtendu rifllessione straziate chì ùn cercanu ch’à dibatte nant’à rughjone nove. 

Eccu, principia u viaghju marittimu, stacchendu i sprufondi di l’anima per risicassi in paese scunnisciutu, tale una nave partendu à scuperta senzu spiranza di ritornu. 

U fiatu crosciu di u so corpu hè digià bellu luntanu da u so puntu d’origine quandu, bagnendu isulotti d’incertezze, spazza cù a so lingua a batticcia di a terra prumessa. 

L’aria sbarrazzendusi pocu à pocu di a so umidità face nasce a vita in sta cuntrata vergine. Hè tuttu da fà, da creà, da inventà senza i mudelli pricuncetti di i mondi di nanzu. 

Tuttu si deve fà oghje è avà, cù una sola custrizzione o carta maestra, i dui mischjendusi, simbulizendu u paradossu magnificu di tuttu principiu. U paradossu di a sola cosa viva nanzu a ghjunta di u tsùnami chetu : l’amazona escendu di a furesta chì era per nasce. 



Per Dan


Aucun commentaire:

Publier un commentaire