Premiu Timpesta 2021 : A mula cumbattente

 

Una nuvella di Philippe Costa

                             

    Inc' a vita campagnola di l'èpuca è malgradu e straziere d'i tempi, l'omu è l'animale si purtavanu rispettu è fideltà currisposti. Babbone Filippu Marìa è a so mula grisgia « Bianchina » eranu uniti fin'à a morte. Battivanu a prese balanina è e faccende eranu numerose.

  Orte, vigne, alivi, inseti, diraschere, legne, baratti diversi. Tutte iss' attività bisugnavanu per fà campà una famiglia è tuttu ghjuvava, nunda si frazava.

     In 1870, in tantu ch' issa vita regulata si passava in paese, « falgina » ella, facìa a s'òpera di spaventu per isse cunfine di l'este di a Francia.

     Subitu lampata a mubilizazione di l'omi è di l'animali, « Bianchina » hè partita in guerra, impiegata pè u tiru di l'ambulanze è i cataletti d'i feriti è i morti.

     Filippu Marìa spiccatu d'a so fida « Bianchina » ùn s'hè francatu manc'ellu di l'appellu per ragghjunghje, à u fronte, un regimentu d'infirmieri per aiutà, curà è cunfurtà e nucente vìttime sopra locu. Si face chì, a mula è l'omu si trovanu impiegati à listessu serviziu umanu. Azzardu, cumbinazione, destinu, à sapè...

                 

  Eccu chì, luntanu d'a Corsica, un fattu inaspettatu si passò ind'a campagna di Saint Privat, à u fronte, in bocca à u nemicu.

     In più bella, vicin'à i suldati, sott'una mitraglia furiosa, à mez' à i lagni addisperati è lughjuli di suffranze, risona un mughju chì supraneghja tuttu. « Bianchina » hè quì è vene di ricunnosce à Filippu Marìa.

     L'animale frumiteghja, scapiteghja, a so chjoma à u ventu, arritta cum'è pè presentazione d'un spettàculu di cìrculu. Ùn si sà s'ell' hè cuntintezza o lagnanza, un salutu o una dumanda.

     Filippu Marìa è Bianchina si ritrovanu pe' un cortu mumentu, troppu cortu. Un capitanu rispunsevule di a squadra, stunatu s'avvicinò di Filippu Marìa è capì subitu a situazione. Un veru miraculu, un bel azzardu, dinò un'emuzione indiscibule.

     Ma dopu i sguardi, i suspiri è i gesti affettuosi, core strintu ci vole à ripiglià a battaglia. D'issa crudela è inabituale faccenda, l'omu è l'animale si ne sarèbbenu passati. À Filippu Marìa l'hè parsu cum'un sognu. Issu scontru inaspettatu, forse un'ùltima fiura di Bianchina. Un' ùltimu segnu di fideltà.

                              

    A guerra finita, Filippu Marìa vultò in paese. Bianchina ella, ùn n'hè più ghjunta. Di sicuru hè morta pè a Francia senza chì u so nome sìa scrittu nant'à una lastra in paese o altrò.

     Menu male chì Babbone l'hà pussuta cuntà è chì si ne parla sempre oghje....