vendredi 1 juillet 2016

Premiu Timpesta 2016 : Antonetti è Lucchini !

79 participanti ani vutatu pà u primu Premiu Timpesta di u nosciu situ, chì mittia in cumpitizioni i nuvelli i più letti d'ugni autori avendu scrittu annant'à T&T mentri l'eserciziu 2015-2016. Iè, 79, chì ani fattu chì 'ssu cuncursu fussi una riescita inaspittata. Vi passaremu l'analisa fina di i vota, ma si pò dì chì nimu hà persu, postu chì l'ultimi classificati cuntabilizaiani quantunca 12 punta, è 'ssi punta, v'assicuremu ch'iddu ci vulia à strappalli. Di manera generali, i vutanti ani privilighjatu a littura è a scelta d'autori menu cunnisciuti, ancu puri s'iddi c'erani in cumpitizioni i tarcani stimati à niveddu naziunali. Passendu, u cumitatu teni à ringrazialli pà a so dispunibilità è a so apartura di spiritu, è pà u niveddu qualitativu chì a so prisenza arreca à u nosciu situ. Vulemu ringrazià dinò à tutti quissi, autori è littori, vutanti è amici, ch'ani "ghjucatu u ghjocu", è cuntribuitu à fà di 'ssa prima annata di u bloggu a riescita chì no sapemu. L'ultimu mesi - quissu di a cumpitizioni - sò par esempiu più di 7000 pagini chì sò stati visti, cù una punta à 685 pagini u 22 di ghjunghju, è  602 u ghjornu di a pruclamazioni di i risultati... Scuseti ghjà, ma pà un bloggu literariu, è in corsu pà u subrapiù, ci hè di chì dacci ghjiriminu è cuntintezza. Ci femu certu i lodi da par no, ma ugnunu a pudarà capiscia. Hè un grossu impegnu di parichji mesa chì hà sontru u so publicu, è ni semu filici. 

Ma parlemu avali di i risultati. Chì hà vintu u primu Premiu Timpesta hè Jo Antonetti, cù u testu sottumissione. I membri di u cumitatu di ridazzioni di T&T participaiani anch'iddi à u cuncursu, ma hè una regula di 'ssu premiu ind'iddi votani l'internoti, è indu nimu pò vutà par sè stessu. Dunca, iè, è a dimu nanzi chì u rimprovaru ci sighi fattu, Jo faci partita di a noscia Ridazzioni (indu ùn semu chè cinqui), ma a regula tr'è no era di lacà viaghjà l'affari senza porghjaci un sustegnu particulari, cacciatu quissu d'un littori nurmali. Par quissa pudemu dì chì a so vittoria, Jo l'hà dissignata da par iddu, ghjà da i primi vota, è sò 22 i littori chì l'ani datu i punta, cù 13 primi piazzi è 54 punti à u finali ! In u mentri chì a cumpitizioni avanzaia, sapiamu ch'idda saria difficiuli di piddalli 'ssa prima piazza. Ebbi ancu 14 punta d'avanzu à un mumentu datu, è s'iddu risicò di fassi richjappà, un sicondu suffiu u purtò versu una vittoria incuntistevuli à u finali. A dimu parchì a pinsemu, u primu cuncursu di u situ hà trovu u vincidori chì li ci vulia. Antonetti pussedi una scrittura unica, unu stilu sfraccassanti chì si ricunnosci in trè filari. T'hà una piuma libarata da tutti i travi di a bedda crianza o di i scoli muralisti, pò essa sputrita di i volti, è ancu sporca, in cuscenza, ma hè dinò una scrittura sinsibuli, intilligenti, è d'una mudernità assuluta. Antonetti hè unu di 'ssi scrittori di lingua corsa chì ani fattu i so primi passi annant'à internet, cù tutti i spazii ch'iddi pudiani truvà. Cù d'altri, hè l'invintori d'una vera literatura underground chì vivi quì, è chì dà ancu frastornu à uni pochi. Ùn ci disturba manc'appena. Ci hè com'è una rivuluzioni in 'ssa manera d'affruntà tutti i tematichi senza mai musciassi sticchitu, ci hè un sensu di a criazioni, è di a criazioni sciolta in tuttu, chì hè a qualità di i più grandi. Da quì à pocu, spiremu, cacciarà u so primu libru, è scumittimu chì si n'hà da parlà.

U sicondu premiu in ghjocu era u Premiu Spiciali T&T, di u cumitatu di ridazzioni. Veni à dì ch'eramu no cinqui à dicida di dallu à un autori particulari di u nosciu bloggu. È à l'unanimità emu purtatu a noscia dicisioni annant'à Angelina Lucchini. Emu pinsatu - a palisemu - à Fabien Flori, par via di l'originalità di i so scritti, 'ssa manera di splurà u viaghju è a diversità culturali... Emu pinsatu à Fabien Raffalli, parchì u so testu American Progress ci purtaia versu ciò chì no aspittemu dinò d'una litteratura : lacà viaghjà l'imaginariu in i cuntrati luntani è cuntruvirsati di a Storia... Ma Raffalli faci dinò partita di u Cumitatu, è pà un Premiu Spiciali ùn pudia vincia... Emu pinsatu à tanti altri autori, Kevin Petroni, Pierre-Laurent Santelli, Anghjula Maria Agostini... Rosecchi, dinò, cù u so furmidevuli Ludwig chì avaria forsa miritatu una piazza più alta in a classifica... Ma tutti eramu d'accordu par fà chì 'ssu Premiu Spiciali rivinissi à Un Viaghjadori, d'Angelina Lucchini. Parchì Angelina hè ghjovana, ch'idda t'hà u talentu, è ch'idda raprisenta l'avvena chì no spiremu pà a noscia literatura. U so testu hè una buffulata d'aria, una fola chì ci hè cuntata à veghja, un ghjuveddu curtu curtu, ma chì dici tantu di u disideriu di libartà, di 'ssu bisognu eternu di sunnià, è chì currispondi in tuttu à i tematichi cari di u bloggu : u viaghju, l'imaginariu senza travi, l'univirsali di a scrittura. Hè tuttu ciò chì no bramemu pà una literatura corsa di dumani. 

Antonetti è Lucchini, dunca... Cussì diffarenti, cussì alluntanati l'unu da l'altra à niveddu di i tematichi è di u stilu... Ma 'ssi dui autori t'ani puri in cumunu d'essa ghjovani, attalintati, appena scunnisciuti par avali, è simbulizighjani una leva literaria ch'ùn dumanda chè à esista è à spannassi. Semu fieri ch'iddi sighini i nosci primi vincidori.


Calibanu, pà a squatra di T&T.

3 commentaires:

  1. BRAVI !!!
    Sò veramente attalintati tutti i dui !
    Ch'ell'ùn piantinu mai di rigalacci i so scritti !
    Bravi bravi bravi !!!

    RépondreSupprimer
  2. Evviva T&T chì ci arreca tante surprese è tantu piacere di lettura. Stu vostru u successu hè miritatu chì stu blogu hè da veru una maraviglia in grazia di sicuru di a variatezza di i scritti scelti è rigalatici, po dinù in grazia di a primura chì vo date à a so presesentazione cù tutti sti ritratti aspessu ancu scuncertanti chì vo ci date à scopre à l'iniziu d'ogni nuvella. Sò questi un soprappiù di qualità ch'o pregiu assai. Torna bravi ! Bravi à i Premiati ! È grazie tante tante à tutta a squadra impegnata è di bella manera di T&T [ spezia di TNT literariu assai "jubilatoire" (cumu dillu in corsa l'aghjettivu "jubilatoire"?)] è spergu, spergu da veru... à prestu prestu per d'altri viaghji in e mente assintimintate di uni pochi chì a si sentenu d'impinnà per dì a soia è spartela cù noi.

    Bellissima Estate à Tutte è à Tutti

    Prima di lasciavvi, una dumanda : Quandu è induve s'hà da fà a rimessa di i prezzi ? Eccu !

    RépondreSupprimer
  3. Vi ringraziemu pà tutti sti cumplimenti. A rimissa di i premii si farà in Bastia, à a Libraria Les Deux Mondes, à una data chì cunvinissi à tutti (autori, Cumitatu, librarii). A faremu sapè da quì à pocu.

    RépondreSupprimer