Premiu Timpesta 2018 : un cuncursu pirmanenti !

Nuvità 2018

Ani da fà trè anni chì a squatra di T&T s’accupa di fà viaghjà un bloggu literariu distinatu à a prosa muderna in lingua corsa, è chì no’ chirimu i vosci participazioni, i vosci vota pà i cuncursi o u vosciu simpliciu intaressu.

Quist’annu, a nuvità è chì no’ ùn saremu micca chè l’animatori d’un situ, o l’urganizatori d’un cuncursu, duvintemu dinò una casa d’edizioni, mudesta certamenti, ma chì ci dumandarà un impegnu supplimintariu chì no’ vulemu seriu è di qualità.

Par quissa avaremu menu tempu pà curra impressu à i cuntribuzioni, circà di mutivà a criazioni à u cutidianu, o nutriscia u situ di manera custanti.

Tandu ci hè vinuta l’idea di fà funziunà principalmenti u bloggu inghjiru à u Premiu Timpesta, chì ci dumandarà à no’ un ingagiamentu puntuali è pirmittarà di mantena vivu u intaressu è a criazioni di tutti.

I reguli sò i siguenti :

Da u Prima sittembri 2017 à u 30 nuvembri 2017, ci sarà un primu cuncursu, intitulatu Cuncursu Apartura, chì pirmittarà ghjà di selezziunà 5 testi pà u cuncursu finali. Ùn ci sarà nienti à vincia al dilà di ‘ssa selezzioni.

Da u Prima di Ghjinnaghju 2018 à u 31 marzu 2018, un sicondu cuncursu (intitulatu Cuncursu Chjuditura) silizziunarà 5 altri testi pà a fini di l’eserciziu, siguitendu i mudalità di u primu cuncursu.

(Ben sicura i 5 selezziunati di u Cuncursu Apartura ùn pudarani participà à ‘ssa siconda selezzioni).

Impurtanti : par ugni cuncursu di selezzioni, sarà un cumitatu di littura custituitu inghjiru à T&T chì vutarà.

Altru puntu impurtanti : i temi sò libari, ma i testi ùn poni varcà i 7000 carattari.

Infini, trà maghju è ghjunghju di u 2018, i 10 testi ritinuti sarani in cunfrontu pà u Premiu Timpesta 2018, chì vidarà u vincidori vincia 300 eurò è uni pochi di rigali impurtanti da l’assuciazioni Tonu è Timpesta.

Una ghjuria sarà custituita pà attribuiscia ‘ssu premiu, ma ci sarà dinò, com’è annu, un Premiu di i Littori è un Premiu Spiciali di u Cumitatu.

Eccu com’ì u nosciu situ funziunarà pà quist’annu chì veni.

Ben sicura i membri di u Cumitatu di selezzioni ùn pudarani participà, ma nienti impidisci ch’iddi sighini missi in linea – à ugni mumentu – i cuntribuzioni for’ di cuncursu.

Par avali, vi pudeti ghjà cunsidarà in cumpitizioni, è invià i testi in missaghjaria privata annant’à facebook, chì u Premiu Apartura cumencia da quì à pocu !

Amicizia à tutti i littori è à tutti i nosci sustegni.