vendredi 9 février 2018

Autonomia

Un testu di Joseph Antonetti


U carrughju hè neru di mondu. E bandere pisate alte è a musica à tappu, i fideghja falà da a finestra. 

Ne ricunnosce unepochi, i vede ride, certi cantanu. Si dice ch’ella ci seria andata vulinteri anch’ella sì a ciuccia ùn fussi stata malata. 

Ghjetta a sigaretta da a finestra è s’affacca in camara di a figliola per vede s’ella dorme. A zitella dorme incippata, li passa a manu nantu à u fronte hè sempre bullente. Sorte pianu pianu per ùn discitalla è fideghja l’ora. Spera chì a so mamma ùn serà in ritardu per via di a manifestazione chì ùn si pò permette di mancà e so duie ore di travagliu. 

Dapoi chì u maritu si n’hè andatu senza dalli indirizzu, strazieghja per sorteci. U so mese di cascera ùn abbasta per pagà a pigiò è tuttu u restu. Allora s’hà pigliatu ‘ssu travagliu in più, à principiu ùn vulia micca chì li si paria d’abbandunà a figliola, ma a mamma hà dettu t’aiuteraghju, eppo' quandu u bisognu hè à mezu a casa ùn si riflette. 

Si ne ritorna à a finestra à fumassine un’ antra è vede sì a mamma ùn affacca. 

I sente chì mughjanu « demucrazia », « libertà », « autonomia », parulle chì ùn anu tantu sensu per ella, ma serà chì ùn ci capisce nunda in pulitica, sà solu chì u capimachja hè un bell’ omu è hè per quessa ch’ella l’hà vutatu dui mesi fà. 

A mamma hè ghjunta. Li serve un caffè è li spieca chì medicine ci vole à dà à a figliola quand’ella si disciterà, poi fila in sala di bagnu à preparassi. Prima d’entre in a duscia, incende u postu per sente appena di musica. Venenu l’infurmazioni, ùn si parla chè di a manifestazione, battaglia di sciffri per sapè quant’ellu ci era ghjente, poi venenu l’interviste di i pulitichi è i sente tutti parlà di a vuluntà di u populu, di l’avvene di u populu d’un destinu chì ùn puderà esse chè ridente cù l’autonomia. 

Sentendu què si dumanda s’elli cunnoscenu e fin’ di mesi difficiule, s’elli cunnoscenu a inghjulia d’ùn pudè fà piacè à a figliola, s’elli cunnoscenu i strazii cum’è ella, è s’ellu era cusì cumu hè chì ùn ne parlanu mai. 

S’appronta davanti à u spechju, si macchilleghja bè sceglie u so più bellu string è i so più belli tacchi, u cliente hà dumandatu duie ore, hè venutu da luntanu per manifestà è ùn vole parte senza sullagiassi. 

In u so core, spera ch’ellu serà giovanu omenu, micca cum’è u vechjacciu di l’altra volta chì sentia l’acqua di cologna è chì li avia dumandatu affari più brutti unu chè l’altru. 

Prima d’andà à u so rendez-vous, entre in a camara di a figliola è a basgia. 

Serà per truvà a forza di fà affari chì a stumacanu per ùn lascià a ciuccia in a miseria, dicendusi chì ella ùn averà bisognu di ghjunghje à ‘ssi punti è chì u so solu penseru serà l’autonomia.


Aucun commentaire:

Enregistrer un commentaire