Un testu di Lena Mondoloni
Com’è s’iddi schjariaiani ghjuveddi, i raghji di soli francaiani i vitrati, po’ si paria ch’iddi sculisciaiani sin’à l’altari. Un silenziu ciuncu invadia a ghjesia. Vistutu cù a to cappa russa, ti pisesti.
Muvisti dopu à righjunghja a sacristia ; ed hè cussi ch’iddu si rinnuvillò u fenomenu. Vidisti l’umbra daretu à a carrega dund’erani posti l’urnamenti. Ugni duminica matina, a vidii st’umbra, quand’ì tù vinii à vestati pà u cirimoniu. Vultendu à u coru, sintii a boci di u preti chì allistinaia i difunti. Era un ghjornu particulari, risintii i prizensi, vidii l’aienti.
Stamani, t’eri arrizzatu cù u nodu à u stomacu. U to sonnu era statu tribbulatu, avii durmitu pocu, certi boci ti risunaiani in capu, sussuraiani u to nomu. I to sonnii, ugni nuttata, si ripittiani, a sola luci in i tenebri era quissa chì baddaia nant’à u candeli. È stamani, n’accesi altrettantu cù a spiranza d’arricà u calori à i spariti. Oh quantu ti piacia d’andà in cimiteriu, duva pur’chè puri ti sintii appaciatu. ‘Ssu prima di nuvembri, c’eri passatu pà nità i tombi di i toii, urnalli di fiori.
U sonu di l’organu ti surtisti da i to sonnia, accumpagnendu i canti rilighjosi, certi firmaiani silinziosi è piinghjiaiani i morti. È tu i vidii, chì si tiniani accantu ad iddi, quantu volti a mani posta annant’à una spadda, o chi i basgiaiani. U to ochji gallizaia in a ghjesia, si mischiaia à a luci quantu à l’armunia di i canti rilighjosi.
L’incensu svighjò i to sensi, i raghji di soli chì pinitraiani i vitrati t’accichetini. In quissa luci chì schjariaia, pustiavi l’umbri strani è palidi, ti sintii bulà, appaciatu. I tenebri ùn esistiani più par tè, a bughjura era scunniscevuli. In ’ssu spaziu vapurosu indu ti ritruvavi, a paci duminaia, ugni odori chì tù sintii ti dilittaia. Ùn ti duvii più scantà da ’ssu traghjettu, quissu chì ti purtaia à u to distinu.
È cussi ci ni volsi, par tè o Ghjuvan Battì, a to sola distinata era d’essa in a luci.
Aucun commentaire:
Enregistrer un commentaire